Umalis na si David Sacks, na tinatawag na crypto at AI czar ng White House, dahil expired na ang limit ng legal service niya — at halatang frustrated na rin siya sa natenggang crypto legislation.
Nag-serve si Sacks bilang “special government employee,” na may limit na nasa 130 days lang kada taon sa federal service. Naabot na niya ‘yung limit, kaya procedural lang talaga ang pag-alis niya at hindi basta-basta biglaan.
Pero sensitibo ang timing ng pag-alis niya. Naiipit pa rin sa Senate ang CLARITY Act at wala pa ring malinaw na petsa kung kailan gagalaw ito.
Tuloy pa din ang mga bangayan pagdating sa stablecoin yield restrictions, na nagpapasaklap sa mga alitan ng mga mambabatas, bangko, at crypto firms.
Sa latest interview niya sa Bloomberg, naglabas talaga ng pagkadismaya si Sacks dahil halos walang ginagalaw ang usapan. Isa siya sa mga naging tulay para maging malinaw at mas maayos ang rules, pati komunikasyon sa pagitan ng crypto industry at policymakers.
Dahil dito, nagkaroon ng short-term gap sa coordination ng White House pagdating sa digital asset policy.
Kahit na mukhang magki-carry pa rin si Sacks ng advisory role pagdating sa mga technology projects, tapos na ang direkta niyang involvement sa paggawa ng crypto policy.
Kaya marami ang nag-aalala sa timing nito. Delay na nga ang klarong crypto regulations tapos wala na agad si Sacks, kaya mas lalong mababagal ang mga plano—lalo na’t ongoing pa rin ang iringan ng iba’t ibang group para mabago pa ang final na version ng bill.
Sa ngayon, nananatiling pending ang CLARITY Act, kaya mas malabo rin kung saan papunta ang crypto policy sa Washington.
