Sinentensiyahan ng United States District Judge na si Percy Anderson ang dating deputy ng Los Angeles County Sheriff’s at helicopter pilot na si Michael David Coberg ng 63 buwan sa federal prison.
Ayon sa press release, tumulong si Coberg sa isang nagpapakilalang crypto businessman para mang-extort sa isang kakumpitensya at mag-set up ng pekeng kaso ng illegal drug possession laban sa isa pang kalaban sa Paramount noong 2021.
Kasama niyang nagtrabaho si Adam Iza, na tinatawag ang sarili niyang “Godfather.” Involved si Iza sa mga fake na marketing at cryptocurrency schemes. Nakakulong na si Iza sa federal custody mula September 2024 at umamin na siya sa federal charges. Malapit na siyang masentensiyahan sa mga susunod na buwan.
Ayon sa authorities, hindi lang basta-bastang security work ang pinasok ni Coberg kasama si Iza. Naging parang business partner at adviser na siya rito.
At isang pagkakataon, nag-usap pa ang dalawa na mag-launch ng negosyo na tutok sa pagbebenta ng anabolic steroids. Sinasabing binabayaran ni Iza si Coberg ng hindi bababa sa $20,000 kada buwan para sa mga serbisyo niya.
“Nangako si Coberg na ipagtatanggol ang Constitution at mga batas ng United States. Pero imbes, tinalikuran niya ang oath na ‘yon at yung mga dapat sana niyang protektahan, abusado niyang ginamit ang kapangyarihan ng badge niya. At ginawa niya ‘to dahil sa matinding kasakiman,” ayon sa sentencing memorandum ng mga prosecutor.
Umamin ng guilty si Coberg nitong September 2025 sa isang count ng conspiracy para mang-extort at isang count ng conspiracy against rights.
Maliban sa sentensiya ng kulong, inutusan din siya ni Judge Anderson na magbayad ng $127,000 na restitution. Naganap ang hatol na ito kasabay ng mas pinaigting na kampanya ng mga US authorities laban sa crypto scams at mga organisadong financial crime.
