Inanunsyo ng US Treasury Department nitong Huwebes, March 26, na si Donald Trump ang magiging unang nakaupong presidente na magkakaroon ng pirma sa US dollar—unang beses itong mangyayari bilang paggunita sa ika-250 anibersaryo ng America.
Nagdulot agad ito ng mga tanong kung ano ang mangyayari sa mga dollar bill na ito kapag tapos na ang termino ng kasalukuyang administrasyon. Ayon sa US law, lahat ng pinapalabas na pera ay mananatiling legal tender nang walang hanggan, pero puwedeng itigil nang tahimik ng susunod na administrasyon ang pagpapalabas nito.
Sinu-solo ni Trump ang Ekonomiya, Binabasag ang 165-Year na Tradisyon
Lalabas ang pirma ni Treasury Secretary Scott Bessent katabi ng pirma ni Trump, magsisimula sa $100 bills sa June, at susunod ang ibang denomination. Sabi ni Bessent sa press release, pagkilala raw ito sa record ng administrasyon pagdating sa ekonomiya.
“Walang mas powerful na paraan para kilalanin ang mga nagawa ng bansa at ni President Donald J. Trump kundi ang paglalagay ng pangalan niya sa US dollar bills, at tamang-tama lang na gawin natin ito ngayong Semiquincentennial,” sabi niya.
Sinang-ayunan din ni Treasurer Brandon Beach, na tinawag si Trump na “architect ng Golden Age economic revival ng America.”
“Hindi lang tama na ilagay ang pirma niya sa US currency, deserve na deserve din talaga,” sabi ni Beach.
Matinding paglabag ito sa matagal nang kaugalian.
Mula noong 1861, pirma lang ng Treasury Secretary at Treasurer ang meron sa US banknotes. Yung mga umiikot na bill ngayon, pirma ni dating Secretary Janet Yellen at dating Treasurer Lynn Malerba ang makikita.
Mabilis din dumating ang mga reaksyon. Isa sa mga unang nag-react si California Governor Gavin Newsom, na nag-post sa X:
“Ngayon, malalaman na talaga ng mga Amerikano kung sino ang dapat sisihin habang tumataas ang presyo ng groceries, gas, renta, at health care.”
Bahagi lang ito ng mga sunod-sunod na hakbang ng Trump administration para ikabit ang pangalan ng presidente sa iba’t-ibang institusyon sa America.
Mas Malawak na Paandar sa Pagpapangalan
Noong December, pinalitan ng administrasyon ang pangalan ng United States Institute of Peace at ginawang Trump Institute matapos ang matagal na gulo tungkol sa kontrol ng org na ‘to.
Pagkalipas ng mga dalawang linggo, isinama na rin ang pangalan ni Trump sa Kennedy Center—na dati ay inalala bilang living memorial kay dating President John F. Kennedy.
Pagsapit ng December 22, pati war equipment nadamay na rin.
Inanunsyo ni Trump na plano ng Navy na mag-develop ng bagong klase ng giant battleships para sakto sa modernong giyera sa dagat. Sabi pa ng Sky News, kinumpirma ng senior official ng administrasyon na tatawagin talaga ang class ng fleet na ito na “Trump Class” battleships.
Hindi tulad ng pagre-rename ng building o pagbago ng pangalan ng battleship, mas mahirap tanggalin ang pirma ng isang presidente sa US dollar. Kahit gusto ng susunod na administrasyon, malaki ang mga balakid pagdating sa proseso at batas.
Ano ang Kaya at ‘Di Kayang Gawin ng Next US President
Ayon sa Legal Tender Act, lahat ng currency na pinalabas ng gobyerno ng US ay mananatiling valid at puwedeng ipampalit ng buong halaga magpakailanman.
Walang president, treasury secretary, o executive branch na pwedeng agad-agad gawing walang-silbi ang mga notes na umiikot na. Kahit may kapangyarihan ang Congress base sa constitution tungkol sa legal tender, malabo namang may administrasyon na gustong ilagay sa alanganin ang ekonomiya sa ganitong proseso.
Sa practical na usapan, ang pwede lang gawin ng mga susunod na administration ay utusan ang Bureau of Engraving and Printing na tigilan na ang pag-print ng notes na may pirma ni Trump. Maglalabas na lang ng bagong currency na tahimik lang ibabalik sa dating normal.
No need ng bagong batas dito. Kusang mawawala na lang din sa sirkulasyon ang mga dating notes habang napapalitan ng bago.
Kaso, matagal din yung process na ‘yon. Depende pa sa dami ng na-print na notes bago sila magpalit ng policy, malamang matagal pang magagamit ng marami yung mga US dollar na may pirma ni Trump.
