Ibinahagi ni Twitter co-founder Jack Dorsey na magbabawas ng halos kalahati ng empleyado ang kumpanya niyang Block — lampas 4,000 ang matatanggal, kaya bababa ang staff mula sa mahigit 10,000, papunta na lang sa halos 6,000.
Gagawin daw ito dahil nababawasan na ang pangangailangan sa mga tao, dahil nga sa bilis ng pag-usad ng AI tools na pwedeng maging dahilan para ma-redundant na yung ibang trabaho.
Tuloy ang Mga Tanggalan Dahil sa AI
Sa memo niyang pinadala sa mga empleyado, inamin ni Dorsey na isa ito sa “pinakamahirap na desisyon” sa Block. Nilinaw din niya na hindi ito dahil kinakapos sa pera ang kumpanya, dahil patuloy pa ring lumalaki ang gross profit at gumaganda ang kita nito.
Pero ayon sa kanya, mabilis na umuunlad ang mga intelligence tools at gusto niyang mas maging maliit at simple ang mga teams — kaya sila nagre-restructure ngayon.
Ang mga matatanggal na empleyado, makakatanggap ng 20 linggo na sahod, tapos dagdag pa ng isang linggo para sa bawat taon na pinasok nila sa company.
May makukuha din silang stock na na-vest hanggang end ng May, anim na buwan na healthcare, mga corporate devices, at $5,000 na transition support. Depende pa sa local laws yung international employees.
Sabi ni Dorsey, mas pinili niyang gawing biglaan na agad ang retrenchment kumpara sa dahan-dahan. Naniniwala siyang kung paisa-isa ang rounds ng layoffs, masisira lang ang morale at tiwala ng mga tao.
Ang Block, na dati ring tinawag na Square, may mga payment system para sa mga merchants at may peer-to-peer service na Cash App.
Sa Cash App, puwedeng bumili at magbenta ng Bitcoin ang mga user. May Bitcoin din ang kumpanya sa balance sheet nila, at nag-i-invest din sila sa Bitcoin infrastructure — tulad ng self-custody tools at mining projects.
Tinututukan ni Dorsey na maging malapit ang Block sa Bitcoin development.
Dati, co-founder din si Dorsey ng Twitter nung 2006, at naging CEO siya ng dalawang beses. Nag-resign na siya noong November 2021.
Noong October 2022, natapos ni Elon Musk ang pagbili sa Twitter at nirebrand ito bilang X. Supportado ni Dorsey yung takeover na ‘yon.
Malaking pagbabago itong restructuring para sa Block, dahil gusto ni Dorsey na lumipat ang kumpanya sa mas maliliit na teams at AI-driven na mga system.
